Answer:

Panahon ng mga Kastila

Sa panahon ng pananakop ng mga Kastila, mabigat ang impluwensiya ng relihiyong Kristiyanismo sa mitolohiyang Pilipino. Sinira ng mga Kastila ang ilang mga nagawa ng mga Pilipino noon na may kinalaman sa kanilang “orihinal” na mitolohiya, at pinalitan ang mga ito ng mga rebulto ni Kristo at ng mga santo. Ang iba naman ay nakalagay lamang sa mga gamit na mabilis masira katulad ng mga kahoy kaya hindi ito tumagal. Kahit na ganito ang nangyari sa kasaysayan, marami pa ring paniniwala ang nanatili sa buhay at kultura ng mga Pilipino. Isang posibleng dahilan nito ay malalim ang ugat ng mga paniniwalang ito sa kultura at ipinapasa sa susunod na henerasyon ang mga paniniwala kaya’t hindi kaagad mabubura ito sa sistema nila. Sa katunayan, hinalo ng mga Filipino ang mga paniniwala nila sa Kristiyanismo, katulad ng krus o bibliya na nagsisilbing anting-anting laban sa mga demonyo. Kahit ang mismong orihinal na paniniwala ay naglaho na, ang esensya nito ay nagpatuloy sa pamumuhay at ibang paniniwala ng mga Filipino.