Mahalagang mahubog ng pamilya ang pananampalataya ng mga kasapi nito dahil naniniwala tayo na ang Diyos lamang ang pinakamakapangyarihan at siyang tanging makatutulong sa atin sa mga oras na tayo ay nagigipit. Ang matibay na pananampalataya at paniniwala sa Diyos ang nagsisilbing dahilan kung bakit nagsisikap at nagpapatuloy sa buhay ang mga tao sa kabila ng kahirapan at mga pagsubok. Ang paniniwalang tutulungan tayo ng Diyos ang mahigpit na pinanghahawakan ng mga Pamilyang Pilipino. Kalimitan sa mga krimen na nangyayari sa lipunan ngayon ay dahil sa mga taong kumakapit sa patalim sapagkat walang matibay na pananampalataya sa Diyos at hindi naniniwalang may Diyos. Sa halip na maging mabuting mamamayan ay nagiging salot pa ito sa lipunan. Upang maiwasan ang pagdami ng ganitong uri ng tao, kailangang bata pa lang ay ipaunawa na natin ang kahalagahan ng matibay na pananampalataya.​