Answer:

+++DISIPLINA ANG KAILANGAN+++

Sadyang malaki na yaring pinag-iba,

Ng Pag-uugali ating mga bata;

Ang dating magalang ngayon ay hindi na,

Ang batang masipag ngayo'y iilan na.

Bibihira na rin itong nagmamano,

Tunay na paggalang sa lola at lolo;

Ang may "Po" at "Opo" nawala na rin po,

Kahit na parating uliting ituro.

Malaki talaga naging kaibahan,

Sa mga ugali nitong kabataan;

Kaya nga magulang lagi n'yong tandaan,

Subaybayan sila, huwag niyong kalimutan.

Minsan ay tayo rin ang dapat sisihin,

Nalimot na natin ang ating tungkulin;

Yaring pamamalo'y nawala sa atin,

Kahit magkamali'y 'di disiplinahin.

Wala na ang oras na ibinibigay,

Wala ng panahon ng pagtalastasan;

Ano man ang gawi ay hinahayaan,

Dahil sa abala lagi ang magulang.

Ituro sa bata ang dapat lakaran,

Hanggang sa paglaki'y 'di malilimutan;

Kalakip pa nito sama-samang pag-aaral,

Ng Salita ng Dios sa ating tahanan.

Kailangan natin yaring disiplina,

Una na sa ating mga ama't ina;

Upang anak natin ay madisiplina,

Ang mabuting gawi sa atin makita.