Gawain sa Pagkatuto Bílang 4: Basahin ang kuwento. Sagutin ang sumusunod na tanong sa ibaba. Gawin ito sa iyong sagutang papel. Ang mga Kalahok sa Patimpalak GDViloria Isang araw habang naglalakad papasok ng paaralan si Jen ay nabása niya ang isang anunsiyo na nakapaskil sa tarangkahan ng kanilang paaralan na nag-aanyaya sa mga may kapansanan na sumali sa patimpalak ng pagguhit at pagkanta sa darating na Biyernes. Sa tuwa’y dali–daling nagtungo si Jen sa kaibigan niyang si Bernard na may polio upang ibalita ito. Batid niya kasi na mahusay sa pagpipinta ang kaibigan. Kinuha niya at inihanda ang gamit sa pagpipinta ng kaibigan. Nagsanay nang mahusay si Bernard sa túlong ng kaibigan niyang si Jen. Matiyaga namang inalalayan ni Jen ang kaibigan hanggang sa araw ng patimpalak. Dahil sa pagtitiyaga ng dalawa, nakamit ni Bernard ang unang puwesto. Tuwang-tuwa ang dalawang magkaibigan. Mga tanong: 1. Ano ang nabasa ni Jen sa tarangkahan ng paaralan? 2. Bakit pinuntahan ni Jen si Bernard? 3. Paano ipinakita ni Jen ang pagmamalasakit sa kaibigang may kapansanan? 4. Ano ang nakamit ng magkakaibigan? 5. Kung ikaw si Jen, gagawin mo rin ba ang kaniyang ginawa? Bakit?​